Yll Limani sapo ka vërtetuar edhe një herë pse mbetet mbreti i padiskutueshëm i romancës në estradën shqiptare. Këtë fundjavë, ylli i popit ka elektrizuar Zvicrën duke performuar për dy netë rresht në Cyrih. Me mijëra adhurues kanë mbushur sallën për të kënduar njëzëri hitet e tij, duke krijuar një atmosferë që vetëm Ylli di ta sjellë. Performancat ishin në një nivel krejt tjetër, me një energji masive që ka mbajtur publikun në këmbë nga fillimi në fund.
Por, mes dritave të skenës dhe hiteve melankolike, një moment i papritur ka vjedhur gjithë vëmendjen e mbrëmjes, duke bërë që i gjithë publiku të shpërthejë në brohoritje. Një i ri ka zgjedhur pikërisht atmosferën magjike të koncertit të Yllit për t’u ulur në gju dhe për t’i propozuar për martesë partneres së tij. Vajza, e kapur në befasi dhe e mbushur me emocione, ka thënë “Po”, teksa çifti ka shkëmbyer një përqafim të ngrohtë dhe të gjatë nën dritat e kuqe të skenës.
Ky moment special është shpërndarë menjëherë në rrjetet sociale, duke u bërë viral. Faqja e organizatorëve e ka ndarë videon në Instagram duke e quajtur pa asnjë dyshim “momentin më të veçantë të natës”, ndërsa komentuesit kanë shpërthyer me urime, duke e cilësuar si propozimin më të lezetshëm ndonjëherë.
Siç tha edhe një nga fansat në komente, kjo është prova e gjallë që koncertet e Yll Limanit kanë atë magjinë e rrallë që i bën njerëzit të besojnë verbërisht te dashuria. Duket se biletat për koncertet e Yllit tashmë po vijnë me një garanci shtesë: emocione të papritura dhe ndonjë unazë të bukur diamanti. /Prive By Liberta Spahiu
