Një incident ndodhi në orët e para të mëngjesit në klubin e natës “Lollipop” në Palasë, ku atmosfera festive u shndërrua në panik total. Teksa në skenë po performonin Ylli Limani dhe grupi Three Dots, një sherr i ashpër shpërtheu mes dy grupeve djemsh në zonën VIP të lokalit.
Fillimisht u raportua për një debat verbal, por shumë shpejt situata degradoi në përplasje fizike. Të pranishmit tregojnë se janë përdorur gotat, shishet dhe sende të forta, madje dëgjohen edhe të shtëna armësh, duke shkaktuar frikë dhe ikje masive nga lokali. Shumë njerëz humbën sendet personale në përpjekje për t’u larguar me nxitim.
Pamje ekskluzive të siguruara nga Replikë.al tregojnë kaosin që mbërtheu klubin. Në skenë, në atë moment, ishte Ylli Limani, i cili u detyrua ta ndërpresë performancën për shkak të përplasjes.
Artisti ka reaguar më pas përmes një postimi në rrjetet sociale, duke shprehur keqardhjen për situatën:
“Çka nisi si një mbramje perfekte, u la në gjysmë për shkak të një konflikti që ndodhi. Më vjen shumë keq edhe ishalla jeni krejt mirë.”
Policia e Vlorës nuk ka dhënë ende një deklaratë zyrtare për ngjarjen, ndërkohë që hetimet janë në vijim. Deri më tani nuk është konfirmuar nëse ka persona të plagosur me armë zjarri, por dëshmitarët flasin për një situatë të rrezikshme që mund të kishte përfunduar edhe më keq.
Një natë që nisi me muzikë dhe festë, përfundoi në kaos dhe frikë, duke rikthyer shqetësimin për sigurinë në eventet masive të natës në bregdetin shqiptar. /Prive By Liberta Spahiu
