Mesazhi i fundit që një vajzë 18-vjeçare shtatzënë i dërgoi motrës së saj, para se të humbte jetën, është zbuluar në gjykatë.
Kylee Monteiro, nga Rehoboth, Massachusetts, u raportua e zhdukur më 7 gusht nga policia e Rehoboth. Ajo ishte tre muajshe shtatzënë në kohën e zhdukjes.
Pas dy javësh kërkime intensive, i dashuri i saj 22-vjeçar, Gregory Groom, u arrestua më 19 gusht. Pas arrestimit të tij, mbetje njerëzore, që besohet t’i përkasin Kylee-s, u gjetën në oborrin e shtëpisë së tij.
Groom po përballet me akuza për vrasje, dhunë ndaj një gruaje shtatzënë, kërcënim të rënduar ndaj dëshmitarëve apo zyrtarëve dhe dhunë në familje. Në seancën e parë gjyqësore në Gjykatën e Taunton më 20 gusht, ai deklaroi se është i pafajshëm.
Sipas prokurorit Jason Mohan, më 8 gusht Groom shkoi vetë në polici për të raportuar zhdukjen e Kylee-s.
Ai pretendoi se ajo kishte lënë një program rehabilitimi, kishte marrë një transport privat dhe kishte shkuar në shtëpinë e tij më 6 gusht. Pikërisht atë ditë, sipas tij, Kylee i kishte treguar se ishte shtatzënë me fëmijën e tij.
Prokurori tha se më pas ndodhi një debat i ashpër mes tyre. Pas këtij momenti, Kylee i dërgoi një mesazh motrës së saj, i cili u lexua në sallën e gjyqit (cituar nga CBS News):
“Ai më hodhi në tokë, më tërhoqi zvarrë për flokësh dhe më shtrëngoi për fyti. Telefoni im ka vetëm 4% bateri, nëse vdes, ishte Greg.”
Pas arrestimit, Groom u mor sërish në pyetje nga policia. Ai pranoi se kishte debatuar me të dashurën e tij dhe e kishte shtyrë, duke pretenduar se ajo kishte rënë dhe ishte goditur në kokë. Kur u pyet ku ndodhej trupi, ai vizatoi një “hartë të thjeshtë” të oborrit të tij.
Hetuesit zbuluan një pjesë dheu të çrregullt në pronën e Groom, ku gjetën trupin e Kylee-s. Prokurori tha se Groom kishte rrëfyer se pas debatit e kishte vrarë Kylee-n duke e goditur me thikë tre herë – një herë në gjoks dhe dy herë në qafë.
Një autopsi pritet të konfirmojë zyrtarisht shkaqet e vdekjes. Groom po mbahet pa të drejtë lirimi me kusht dhe do të rikthehet në gjykatë më 10 shtator për seancën e provave.
