Justin Bieber ka tronditur rrjetin me një reagim emocional dhe të papritur në Instagram. Këngëtari, i cili prej kohësh përpiqet të jetojë një jetë më të qetë e larg dramës, ka zbuluar së fundmi se ende përballet me shpërthime të forta zemërimi që vijnë si pasojë e plagëve të së kaluarës.
“Mos mendoni se po të mundesha, nuk do të kisha rregulluar veten? Unë jam i thyer. Kam probleme me zemërimin,” shkroi ai në një prej postimeve që mori vëmendje të menjëhershme nga ndjekësit.
Në një tjetër story, Justin ndau edhe një bisedë të tensionuar me një mik, të cilit i kishte ndërprerë kontaktin për shkak se nuk e pranonte versionin e tij të sinqertë, me të gjithë emocionet përfshirë. “Nëse nuk të pëlqen zemërimi im, nuk të pëlqej unë. Zemërimi është përgjigja ime ndaj dhimbjes që kam përjetuar,” tha ai.
Ky shpërthim erdhi pak ditë pas një përplasjeje me paparacët në Malibu, ku ai kishte reaguar ashpër: “Hiqmu nga fytyra e qelbur!” – një moment që dëshmoi se trazirat e brendshme janë ende të pranishme.
Ndonëse disa fansa i qëndruan pranë me komente mbështetëse, të tjerë u shprehën të zhgënjyer nga mënyra si ai zgjodhi të publikojë biseda private dhe të tregojë fytyrën e tij të errët.
Vetë Justin ka theksuar se është rruga shpirtërore dhe besimi në Zot që po e ndihmojnë të qëndrojë me këmbë në tokë dhe të rikthejë përqendrimin tek të tjerët, e jo vetëm tek vetja.
Një gjë është e qartë: nën buzëqeshjen e tij ikonike dhe famën globale, Justin Bieber po përpiqet ende të përballet me demonët e tij më të vjetër.
/Prive By Liberta Spahiu
