Bota e televizionit turk nuk zhgënjen kurrë kur bëhet fjalë për drama, por këtë herë skenari i vërtetë po luhet pas kamerave të “Esref Rüya”. Vetëm pak kohë pasi u bë e ditur se projekti televiziv do të përfundojë papritur pas vetëm dy episodesh, rrjeti po gumëzhin nga një tjetër lëvizje e papritur. Demet Özdemir, e cila ndan rolin kryesor me Çağatay Ulusoy, ka bërë hapin e radhës në botën digjitale duke fshirë nga lista e saj e ndjekësve në Instagram kolegen e serialit, Ceren Benderlioğlu.
Ky “unfollow” digjital nuk ka kaluar pa u vënë re nga fansat vigjilentë në platformën X, të cilët po pyesin me të madhe se çfarë ka ndodhur saktësisht mes vajzave në prapaskenë. Sipas reagimeve në rrjet, pothuajse çdo javë kasti i këtij produksioni po përballet me kaos dhe zhvillime të reja që edhe vetë audienca e ka të vështirë t’i ndjekë e të mbajë ritmin e ngjarjeve. Në epokën ku jetojmë, një klikim i vetëm në rrjetet sociale flet më shumë se çdo deklaratë për shtyp, duke konfirmuar në heshtje zërat për tensione të forta në sheshin e xhirimeve.
Fakti që yjet e serialit kanë filluar të shkëpusin lidhjet me njëri-tjetrin ende pa u transmetuar finalja, lë shumë vend për dyshime mbi arsyet e vërteta që çuan drejt mbylljes së këtij produksioni. Duket se pakënaqësitë personale kanë peshuar më shumë, duke u reflektuar edhe te vendimi përfundimtar për një finale të përshpejtuar. Teksa “Eşraf Rüya” përgatitet të mbyllë rrugëtimin e tij ekranik për dy javë, vëmendja e publikut mbetet e përqendruar te jeta reale e aktorëve, të cilët dëshmuan edhe një herë se miqësitë e ekranit ndonjëherë skadojnë shumë më shpejt se vetë kontratat. /Prive By Liberta Spahiu.
