Haxhi Thaçi, babai i ish-Presidentit të Kosovës, Hashim Thaçi, ka ndërruar jetë. Lajmin për vdekjen e tij e ka bërë të ditur faqja “UÇK – Ushtria Çlirimtare e Kosovës”, ndërsa është konfirmuar edhe nga burime të afërta me familjen për median “Nacionale”.
Vetëm disa ditë më parë, ish-presidenti Thaçi, i cili aktualisht po mbahet në paraburgim në Hagë, kishte marrë një leje të veçantë për t’u kthyer në Kosovë dhe për ta vizituar babain e tij në spital.
Vizita e tij kishte ngjallur reagime të shumta në publik dhe media, për shkak të natyrës emocionale të momentit dhe rrethanave të veçanta në të cilat ndodhet Thaçi.
Haxhi Thaçi njihej si një figurë e respektuar në vendlindjen e tij dhe kishte qenë gjithmonë mbështetje për familjen, përfshirë edhe në periudhat më të vështira politike të djalit të tij.
Ceremonia e varrimit pritet të mbahet në ditët në vijim, ndërsa ende nuk ka detaje nëse ish-Presidenti Hashim Thaçi do të mund të marrë pjesë në të. /Prive By Liberta Spahiu
