E nisi si një provokim gjatë qëndrimit në shtëpinë e “Big Brother VIP 5” dhe tashmë e ka kthyer në një projekt muzikor për tregun. Ndonëse shumë mund të mendonin se Rogerti nuk e kishte seriozisht me ngacmimet ndaj Selinës dhe se gjithçka do të mbetej vetëm një dinamikë loje, ai sapo ka vërtetuar të kundërtën. Vetëm pak minuta më parë, ish-banori ka publikuar këngën e tij më të re, e cila mban pikërisht titullin e debatit të tyre të njohur, “Ala Ya Dubai”.
Për t’i dhënë formë këtij projekti, ai ka bashkuar forcat me reperin e njohur Don Phenom. Kënga vjen e shoqëruar me një videoklip të kuruar ku dyshja shfaqet duke luajtur bilardo, një lëvizje e qartë e Rogertit për të kapitalizuar vëmendjen që mori nga debatet brenda shtëpisë në një produkt muzikor.
Kjo dinamikë merr tjetër kuptim kur kujtojmë se çfarë ndodhi vetëm një ditë më parë. Këtë të shtunë, Selin ishte e ftuar në emisionin “Goca dhe Gra”, ku nuk shpëtoi dot pa u pyetur për Rogertin dhe videot provokuese që kanë qarkulluar ditët e fundit në rrjet, të cilat ngritën madje edhe aludime për një përballje të mundshme në gjykatë. Gjatë intervistës, fituesja e edicionit e kaloi situatën me qetësi duke u shprehur se veprimet e tij pas daljes nga shtëpia bëhen ekskluzivisht për vëmendje. Ajo theksoi se Rogerti po përpiqet të mbahet në qendër të vëmendjes dhe të faktorizohet duke përdorur emrin e saj, ndaj dhe ajo vetë kishte vendosur të mos i jepte më hapësirën apo reagimin që ai po kërkon.
Vetëm 48 orë pas këtyre deklaratave televizive të Selinës vjen edhe publikimi i këngës së re, i cili ngjan si një përgjigje e drejtpërdrejtë e tij. Mbetet për t’u parë si do ta presë publiku këtë lëvizje të Rogertit. /Prive By Liberta Spahiu
