Produktet kozmetike ndihmojnë nga jashtë, por shëndeti i vërtetë i lëkurës nis nga brenda. Nutricionistja e njohur Leona West-Fox thekson se ushqimi ndikon drejtpërdrejt në nivel qelizor. Këtu janë shtatë ushqimet kryesore që duhet t’i përfshini në dietën tuaj për një lëkurë rrezatuese.
1. Ushqimet e pasura me Vitaminë C
Vitamina C është e domosdoshme për prodhimin e kolagjenit dhe mbrojtjen e qelizave nga dëmtimet. Ajo nuk prodhohet vetvetiu nga trupi, ndaj duhet marrë përmes ushqimit. Specat e kuq, agrumet, kivi dhe brokoli janë burime fantastike që ndihmojnë në ruajtjen e strukturës së lëkurës.
2. Farat
Farat e lanit dhe chia-s janë burime shumë të pasura me acide yndyrore Omega-3 bimore. Përveç kësaj, farat chia përmbajnë zink, i cili luan një rol kyç në riparimin e indit të lëkurës dhe në rregullimin e yndyrës. Ato mund t’i shtoni lehtësisht në çdo smoothie apo sallatë.
3. Perimet me gjethe jeshile
Spinaqi, rucola dhe lakra kale janë të mbushura me klorofil dhe vitamina A, C e K. Këto perime mbështesin proceset e detoksifikimit në organizëm dhe ndihmojnë në pastrimin e thellë të lëkurës, duke i dhënë asaj një ton më të barabartë, të freskët dhe plot jetë.
4. Burimet cilësore të proteinave
Mishi i pulës, vezët, mishi i viçit dhe tofuja i japin trupit acidet amino të nevojshme për ndërtimin e kolagjenit. Është e rëndësishme të zgjidhen proteina natyrale dhe të shmangen mishrat e përpunuar si sallami apo hot-dogët, të cilët nxisin inflamacionin në lëkurë.
5. Peshqit me yndyrë
Salmoni dhe peshqit e tjerë me yndyrë janë të pasur me Omega-3, të cilat ruajnë barrierën mbrojtëse të lëkurës dhe mbajnë hidratimin. Këto acide yndyrore ulin inflamacionin, duke parandaluar kështu bllokimin e poreve, pamjen e zbehtë dhe procesin e plakjes së parakohshme.
6. Frutat e malit
Boronicat, manaferrat dhe dredhëzat janë të mbushura me antioksidantë dhe polifenole. Këta përbërës luftojnë radikalet e lira, të cilat janë përgjegjëse kryesore për shkatërrimin e kolagjenit. Përveç se janë të shijshme, ato mbrojnë lëkurën nga humbja e elasticitetit.
7. Erëzat e freskëta
Nenexhiku, rigoni, pershtati dhe koriandri nuk duhet të përdoren vetëm si dekorim. Ato janë të pasura me minerale, klorofil dhe përbërës natyralë antibakterialë. Përdorimi i tyre me bollëk në ushqimet e përditshme ndihmon në pastrimin dhe ndriçimin natyral të lëkurës. /Prive Bruto
