Pavarësisht se divorci i tyre u finalizua më 31 dhjetor 2024, pas më shumë se 8 vitesh proces gjyqësor, Brad Pitt (61) dhe Angelina Jolie (49) vazhdojnë të përballen në gjykatë – këtë herë për një çështje biznesi.
Jolie kishte akuzuar Pitt për abuzim ndaj saj dhe fëmijëve gjatë një fluturimi në vitin 2016, akuza që ai i ka mohuar gjithmonë. Ndërkohë, konflikti i tyre përfshin tani Château Miraval, një kantinë vere në Francë, të cilën e blenë bashkë për 25 milionë euro në vitin 2008.
Në vitin 2021, Jolie vendosi të shesë pjesën e saj në biznes dhe në 2022 Pitt e paditi, duke pretenduar se ajo theu marrëveshjen duke shitur aksionet pa dijeninë e tij – dhe atë te një oligark rus. Jolie reagoi duke thënë se kishte paralajmëruar Pitt për shitjen dhe ai i kishte kërkuar të nënshkruante një marrëveshje konfidencialiteti (NDA), të cilën ajo e refuzoi. Më pas, ajo e shiti aksionin për 67 milionë dollarë kompanisë Tenute del Mondo.
Në vitin 2024, një gjykatës urdhëroi që Pitt të dorëzonte dokumente që, sipas avokatëve të Jolie, përmbajnë prova për abuzime, mashtrime dhe mbulim të së vërtetës.
Tani, Pitt ka kërkuar në gjykatë që Jolie të dorëzojë komunikimet me Alexey Oliynik nga Stoli Group, i cili thuhet se kishte njohuri të drejtpërdrejtë për shitjen. Por Oliynik ka refuzuar të bashkëpunojë, duke u mbrojtur me shtetësinë e tij zvicerane.
Procesi gjyqësor për këtë çështje pritet të zhvillohet brenda këtij viti./Prive By Liberta Spahiu
