Kinematografia kosovare shënon një tjetër moment të rëndësishëm në Kanë. Sot është hapur zyrtarisht Pavijoni i përbashkët Kosovë-Shqipëri në kuadër të “Marché du Film” në Festivalin e Filmit, por vëmendja e veçantë shkon te premiera botërore e filmit “DUA”, me regji nga Blerta Basholli.
Filmi po shfaqet në programin prestigjioz “Semaine de la Critique” dhe garon për katër çmime kryesore, duke e kthyer këtë shfaqje në një ngjarje me shumë rëndësi për vendin në arenën globale. Pritja dhe vlerësimet kanë qenë pozitive, duke dëshmuar sërish potencialin e historive tona për të tërhequr vëmendjen e kritikës evropiane dhe asaj ndërkombëtare.
Përtej suksesit profesional, kjo shfaqje solli me vete edhe emocione për ekipin dhe delegacionin e pranishëm. Drejtoresha e Qendrës Kinematografike të Kosovës, Blerta Zeqiri, e ka cilësuar atë drejtpërdrejt nga Kana si “suksesin ma të madh që ka pasë Kosova me film”.
Përmes një dedikimi prekës, ku kujtoi babain e saj të ndjerë në këtë ditë të rëndësishme, ajo zbërtheu thelbin e projektit: “Sot është premiera e filmit DUA — një film që flet për jetën e sfidat me i rritë fëmijët në një kohë të çmendur, nën okupim.” Ky prezantim është kthyer në një moment krenarie dhe homazhi, duke nisur kështu një rrugëtim që synon të sjellë trofe të rëndësishme në shtëpi. /Prive By Liberta Spahiu
