Testi 1-minutësh që mund të tregojë sa gjatë do të jetoni!
Një test i thjeshtë fitnesi, që zgjat vetëm një minutë, mund të japë tregues për jetëgjatësinë tuaj, sipas studimeve të reja shkencore.
Të jetosh shëndetshëm do të thotë të kujdesesh për trupin, të ushqehesh mirë, të ushtrohesh rregullisht dhe të ruash formën fizike. Dhe pikërisht këto janë gjërat që mat testi “1MSTS” (One Minute Sit-To-Stand Test), i cili kërkon vetëm një karrige dhe 60 sekonda kohë.
Si kryhet testi
Testi konsiston në numërimin e herëve që arrini të uleni dhe ngriheni nga karrigia brenda një minute – pa përdorur duart për ndihmë.
Ja si ta kryeni saktë:
Vendosni një karrige me shpinë të mbështetur në mur (pa mbështetëse për duar).
Uluni, me këmbët në dysheme dhe gjunjët në një kënd 90°.
Vendosni kohëmatësin për 1 minutë.
Ngrihuni plotësisht pa ndihmën e duarve dhe më pas uleni sërish – kjo është një përsëritje.
Vazhdoni kështu për 60 sekonda, duke numëruar sa herë e kryeni lëvizjen.
Pulmologu Dr. Ricardo José shpjegon për Metro:
“Në përgjithësi, të rriturit e shëndetshëm nën 40 vjeç arrijnë të bëjnë të paktën 40 ngritje në një minutë. Mesatarja bie me moshën: 30–40 për të moshës së mesme dhe 20–30 për ata mbi 70 vjeç.”
Kujdes përpara se ta provoni
Ky test nuk duhet bërë nëse ndiheni të sëmurë, të trullosur apo me dhimbje në muskuj apo kyçe.
Gjithashtu, shmangeni nëse keni sëmundje të zemrës, infeksione aktive, ose në mjedise shumë të nxehta apo të ftohta.
Nëse gjatë testit ndjeni dhimbje gjoksi, marramendje apo vështirësi në frymëmarrje, duhet ta ndaloni menjëherë.
Çfarë tregojnë rezultatet
Një studim zviceran, botuar në International Journal of Public Health, tregoi se:
Meshkujt e rinj (20–24 vjeç) kryenin mesatarisht 50 ngritje në minutë,
Femrat e reja 47 ngritje,
Ndërsa të moshuarit (75–79 vjeç) bënin mesatarisht 30 ngritje meshkujt dhe 27 femrat.
Lidhja me jetëgjatësinë
Një tjetër studim i kryer në Klinikën e Mjekësisë së Ushtrimeve në Rio de Janeiro, me mbi 4,000 pjesëmarrës të moshës 46–75 vjeç, zbuloi një lidhje mes performancës në test dhe jetëgjatësisë.
Ata që arrinin të ngriheshin e të uleshin pa prekur asgjë morën rezultatin maksimal – dhe shumica prej tyre ishin ende gjallë pas më shumë se një dekade.
Ndërsa ata me rezultate më të ulëta kishin shanse më të larta për të ndërruar jetë, veçanërisht nëse kishin sëmundje të zemrës.
Dr. Claudio Gil Araújo, autor i studimit, shpjegoi:
“Edhe pse nuk mund të thuhet se një rezultat perfekt garanton jetë më të gjatë, është krejtësisht e arsyeshme të pritet diçka e tillë.”
Një mënyrë për të kuptuar trupin tuaj
Geriatri britanik Dr. Jugdeep Dhesi i tha BBC Future:
“Rezultatet e testit mund të na ndihmojnë të kuptojmë se çfarë duhet përmirësuar në shëndetin e personit, në mënyrë që të jetojë më mirë dhe më gjatë.”
Ai shton se testet e tilla në kushte shtëpie janë një mënyrë e thjeshtë për të vlerësuar formën fizike, për të monitoruar përparimin dhe për t’u motivuar të kujdesemi më shumë për shëndetin tonë.
Në vetëm një minutë, ky test i thjeshtë mund t’ju tregojë shumë për forcën, qëndrueshmërinë dhe vitalitetin tuaj — tregues të drejtpërdrejtë të sa gjatë dhe sa mirë mund të jetoni. /Prive By Liberta Spahiu
