Të dielën e kaluar, Malbora Gurra mbylli rrugëtimin e saj në “Ferma VIP 3”. Tani, një javë pas daljes nga shtëpia, ajo ka vendosur të thyejë heshtjen për dinamikat e fshehura të formatit në një intervistë për Prive By Liberta Spahiu. Duke folur hapur për raportet me fermerët, ajo zbuloi një episod mjaft të ndjeshëm dhe të patreguar më parë që lidhet me poeteshën Mimoza Ahmeti.
Sipas rrëfimit të saj, gjatë orëve të vona të natës, Moza i kishte kërkuar të flinte në divan, pasi vajzat e tjera aty pranë ishin me temperaturë. Pasi Malbora u kujdes ta rehatonte me jastëk dhe jorgan, u përball me një pyetje që e preku thellë. Me zë të ndrojtur, Moza e pyeti: “A mund të ha dhe diçka?”. Kjo kërkesë fare e thjeshtë, por në një moment dobësie, e bëri Malborën të reflektonte mbi presionin e madh dhe izolimin e poeteshës brenda asaj shtëpie.
Por tensioni i vërtetë erdhi pas reagimit të ftohtë të Sara Karajt. Malbora tregoi se Sara ndërhyri duke kundërshtuar hapur që Moza të hante aty, duke u justifikuar ashpër me rregullat e lojës dhe faktin se poetesha ishte ndarë nga buxheti i përbashkët. Ky moment e revoltoi Malborën, e cila i vendosi kufijtë prerë duke iu kthyer: “Sara dëgjo. Sa të jem unë në këtë shtëpi, ajo do ha, do pi, do rri dhe do flejë ku t’i ketë qejf ajo”. Për ish-konkurrenten, kjo ishte prova e qartë se Moza ndihej e sulmuar nga disa anë, gjë që e shtyu Malborën t’i kthehej në një mburojë brenda shtëpisë. /Prive By Liberta Spahiu
