Zvicra dhe Gjermania kanë qenë historikisht “zona e rehatisë” për eventet e mëdha të diasporës shqiptare, aty ku biletat shiten shpejt dhe tregu është tashmë i konsoliduar. Por këtë vit, busulla e koncerteve të mëdha po kthehet drejt veriut. Më 2 Maj, Norvegjia do të presë edicionin e parë të “Alb Festival”, një ndërmarrje masive logjistike dhe artistike e udhëhequr nga Arjeta Topallaj. Përmes një pune të palodhur dhe një vizioni të qartë, ajo po synon të hapë një derë të re për artistët shqiptarë dhe publikun skandinav.
Nga “AlbaNights” te një festival i hapur për të gjithë
Ideja për të sjellë një festival të përmasave të tilla në Norvegji nuk lindi brenda natës. Arjeta tregon se ky është një evolucion i natyrshëm i punës së saj të vazhdueshme me “AlbaNights”, përmes së cilës ka organizuar festa dhe evente më të vogla për komunitetin lokal. Gjatë kësaj kohe, ajo vuri re një potencial të pashfrytëzuar: nevojën për evente gjithëpërfshirëse.
Festivali është konceptuar të thyejë kufizimet e klubeve të mbyllura të natës, duke u ofruar një hapësirë ku mund të marrin pjesë të gjitha grup-moshat, përfshirë familjarët me fëmijë. Për këtë arsye, organizimi në natyrë ishte thelbësor.
“Kam dashur me kriju diçka jashtë, në natyrë, sepse Norvegji kemi vende shumë të bukura dhe kjo e jep një ndjenjë krejt tjetër,” shprehet Topallaj, duke theksuar synimin për të ndërtuar jo thjesht një koncert, por një përvojë ku gjithsecili ndihet pjesë.
Ndonëse pesha e një eventi të tillë bie kryesisht mbi supet e saj, ajo e pranon se prapa këtij suksesi fshihet një ekip i tërë profesionistësh që po e ndihmojnë të kthejë këtë vizion në realitet.
Bindja e artistëve: Një filtër vizioni
Sjellja e emrave të mëdhenj të estradës në një treg të paprovuar si Norvegjia mund të duket si një sfidë e frikshme. Artistët janë mësuar me tregje evropiane ku gjithçka funksionon me sy mbyllur. Megjithatë, strategjia e Arjetës nuk ka qenë t’i bindë ata me çdo kusht, por t’u ofrojë një ftesë për t’u bërë pjesë e diçkaje novatore.
“Unë nuk kam provu me i bind. Thjesht ua kam tregu mundësinë dhe idenë se çka po mundohemi me kriju këtu,” thekson ajo me një sinqeritet të prerë. “Kush e ka kuptu atë vizion, ka ardh dhe e ka mbështet. Kush e kupton, vjen… kush jo, mbetet mbrapa.”
Sfida e vërtetë ndodh në prapaskenë
Me një formacion prej mbi dhjetë artistësh kryesorë dhe moderatorin e njohur Labinot Gashi, dinamika e prapaskenës është ndoshta testi i vërtetë i këtij festivali. Koordinimi kërkon një saktësi gati ushtarake, ku menaxhohet çdo detaj nga ardhja e artistëve, qëndrimi i tyre dhe deri tek ngjitja në skenë.
Sipas Arjetës, vështirësia më e madhe është ruajtja e balancës në kohë, pasi në një event live, çdo minutë vonesë mund të krijojë një efekt domino për të gjithë programin.
“Këto janë gjëra që publiku nuk i sheh, po që kërkojnë shumë organizim dhe përgjegjësi prapa skenës. Po është pikërisht kjo pjesë që e bën diferencën në një event të këtij niveli,” shpjegon organizatorja.
E ardhmja: Një bast i llogaritur për tregun evropian
Një iniciativë kaq e madhe larg epiqendrës tradicionale të diasporës mbart patjetër rreziqe financiare dhe menaxheriale. Por Arjeta nuk e sheh “Alb Festival” thjesht si një bast afatshkurtër të varur vetëm nga shitja e menjëhershme e biletave, por si një hap të domosdoshëm për të hapur me forcë tregun skandinav.
Pritshmëritë janë të larta për datën 2 Maj. Atmosfera, numri i pjesëmarrësve dhe reagimi i publikut atë natë do të shërbejnë si treguesi kryesor nëse festivali do të zgjerohet në një format dy-ditor vitin e ardhshëm.
“Gjërat e reja kërkojnë kohë me u ndërtu dhe me u konsolidu. E rëndësishme është që kemi fillu me kriju një bazë që mundet me u rrit me kohë,” përfundon ajo.
Përtej Norvegjisë, ambicia e “AlbaNights” nuk ndalet këtu. Ekzistojnë plane konkrete që ky koncept festivalesh të eksportohet edhe në shtete të tjera ku ka mbështetje masive nga komuniteti shqiptar, përfshirë këtu edhe Gjermaninë, duke dëshmuar se “Alb Festival” është vetëm hapi i parë i një projekti me përmasa ndërkombëtare. /Prive By Liberta Spahiu
View this post on Instagram
