Ishte vetëm 21 vjeç kur Cassie Ventura, këngëtarja dhe modelja e njohur, nisi një marrëdhënie me mogulin e muzikës hip-hop Sean “Diddy” Combs.
Ajo ishte në fillimet e karrierës, një emër premtues i labelit të tij, ndërsa ai, një nga figurat më të fuqishme të industrisë, me influencë, pasuri dhe kontroll absolut mbi gjithçka që e rrethonte. Por prapa imazhit të një çifti glamuroz, fshihej një realitet i errët që sot, për herë të parë, po del në dritë në një sallë gjyqi në Nju Jork.
Në një proces federal për trafikim seksual dhe abuzim fizik, Cassie ka dhënë një dëshmi tronditëse që, sipas ekspertëve ligjorë, mund të jetë pikë kthese në mënyrën si trajtohet abuzimi në industrinë e argëtimit. Dëshmia e saj zbërthen 11 vitet që ajo i kaloi pranë Diddyt, jo si partnere, por si viktimë e një lidhjeje toksike, të mbushur me kontroll, frikë dhe degradim.
“Freak-offs”, pishina me baby oil dhe aktet e detyruara seksuale
Një nga rrëfimet më të tmerrshme ishte për të ashtuquajturat “freak-offs” — situata ku Cassie detyrohej të kryente akte seksuale me meshkuj të tjerë, të zgjedhur nga Combs, ndërkohë që ky i fundit shikonte, filmonte ose merrte pjesë. Ajo përshkroi raste kur i kërkohej të lyente trupin me baby oil çdo pesë minuta, ndërsa një herë i urdhërua të hynte në një pishinë të fryrë të mbushur me baby oil, brenda një dhome hoteli luksoz, vetëm për të përmbushur fantazitë e tij seksuale.
Nga kërcënimet emocionale te dhuna fizike brutale
Cassie foli edhe për episode brutale dhune, përfshirë një rast të filmuar në vitin 2016, ku Diddy e godet dhe e tërheq zvarrë në një hotel. Ajo tregoi se ai e kërcënonte shpesh me publikimin e videove intime nëse ajo guxonte të largohej ose ta refuzonte. “Isha në një kafaz të ndërtuar me frikë dhe turp”, deklaroi ajo, duke e përshkruar jetën me të si një burg luksoz.
Manipulim, izolim dhe shkatërrim psikologjik
Ventura përshkroi mënyrën se si Combs e izoloi nga të tjerët, duke i kontrolluar çdo lëvizje, karrierën, paratë dhe madje edhe trupin e saj. Ajo pranoi se shpesh pranonte të merrte pjesë në këto akte ekstreme vetëm që të ruante lidhjen me të dhe të mos përjetonte zemërimin e tij.
Akuzat dhe mohimet
Ndaj Diddy-t janë ngritur akuza për trafikim seksual, përdhunim, dhunë fizike dhe psikologjike, shfrytëzim ekonomik dhe detyrim për akte seksuale të paligjshme. Vetë Combs i ka mohuar të gjitha, duke i cilësuar si “akuza të sajuara nga një ish-e dashur hakmarrëse”, por provat, dëshmitë e detajuara dhe videoja e sulmit në hotel kanë vënë në pikëpyetje deklaratat e tij.
Gjyqi pritet të zgjasë për disa javë, por dëshmia e Cassie-s tashmë ka ngritur një dallgë të re debati për mënyrën se si fuqia dhe fama shpesh i bëjnë të padukshme abuzimet më të tmerrshme.
