Rasti tragjik i Liridona Ademaj-Murselit po shkon drejt një epilogu vendimtar në sallën e gjyqit, ndërsa detajet e reja vazhdojnë të mbajnë mbërthyer opinionin publik.
Sipas raportimeve të fundit nga Indeksonline, Prokuroria ka marrë një qëndrim të hekurt duke kërkuar dënimin maksimal me burgim të përjetshëm për të akuzuarit Naim Murseli, Granit Plava dhe Kushtrim Kokalla, për atë që e cilëson si një krim makabër të kryer para syve të fëmijëve.
Në fjalën e saj përfundimtare, prokurorja e rastit, Javorka Perlinçeviq, çmontoi alibinë e bashkëshortit të viktimës, duke e përshkruar ngjarjen si një planifikim gjakftohtë. Duke treguar përmasat e vërteta të këtij plani, ajo theksoi në sallë se skenari i tyre ka qenë aq mirë i përgatitur, saqë “atë do ta kishin zili edhe skenaristët e Hollivudit”.
Duke perifrazuar dosjen dhe deklaratat e prokurorisë, në gjykatë u theksua se Naim Murseli u përpoq vazhdimisht të ndërtonte profilin e një njeriu human. Ai pretendoi se raporti me Granit Plavën ishte thjesht një njohje ku Naimi i ofronte ndihmë financiare me arsyetimin për t’i “gjendur” pranë në vështirësi. Megjithatë, prokurorja vuri në dukje kontradiktën thelbësore në këtë mbrojtje. Ajo theksoi absurditetin e pretendimit të Naimit, i cili nuk e pranon fajësinë, por në të njëjtën kohë deklaron se njeriu që ai vetëm e ka ndihmuar në jetë, doli i maskuar para veturës dhe i mori jetën bashkëshortes së tij pa kurrfarë arsyeje.
“…duke mos pasur asnjë dilemë që ai ka qenë Granit Plava, edhe pse sipas fjalëve të tij, personi i cili ka dalë para veturës ka qenë i maskuar,” ka deklaruar prerazi prokurorja Perlinçeviq, duke mos lënë hapësirë për dyshime mbi bashkëpunimin mes tyre.
Me kërkesën për burgim të përjetshëm tashmë zyrtare mbi tryezë, i gjithë fati i këtij procesi të ndjeshëm mbetet në duart e trupit gjykues, të cilët pritet të japin vendimin final për një nga ngjarjet më të rënda kriminale të viteve të fundit. /Prive By Liberta Spahiu
