Bota e muzikës indiane është tronditur nga vdekja e papritur e këngëtarit të njohur Zubeen Garg, i cili ndërroi jetë në Singapor. Fillimisht u raportua se bëhej fjalë për një vdekje natyrale, por së fundmi autoritetet në Assam kanë hapur një hetim të gjerë për të zbuluar të vërtetën pas kësaj ngjarjeje.
Sipas Times of India, Departamenti i Hetimeve Kriminale (CID) ka nisur një hetim në shkallë të plotë. Janë ngritur dyshime të forta pasi ndaj rastit janë regjistruar mbi 55 kallëzime penale (FIRs) dhe katër persona janë identifikuar si të dyshuar. Për më tepër, autoritetet kanë urdhëruar një autopsi të dytë, për të sqaruar çdo paqartësi që lidhet me shkaqet e vdekjes së artistit.
Në këtë mes, një video e publikuar së fundmi nga News18 ka shtuar edhe më shumë mister. Në pamje shihet Garg i lodhur, duke u përpjekur të notojë, ndërsa duket qartë se ai po humbte forcat. Fansat kanë shpërthyer me kritika në rrjete sociale duke pyetur:
“Pse askush nuk e ndihmoi?”. Kjo ka rritur zemërimin publik dhe ka shtuar aludimet për neglizhencë apo edhe një komplot të qëllimshëm.
View this post on Instagram
Familjarët dhe fansat kanë ngritur zërin duke kërkuar transparencë, ndërsa në rrjetet sociale janë shpërndarë me mijëra reagime që aludojnë për një plan të errët kundër këngëtarit. Për momentin, autoritetet kanë krijuar edhe një grup special hetimor (SIT), i cili po mbledh prova dhe dëshmi për të hedhur dritë mbi rastin.
Vdekja e Garg ka lënë një boshllëk të madh në muzikën indiane. Ai ishte një nga emrat më të dashur për publikun, i njohur për zërin e tij unik dhe këngët që për vite me radhë kanë shoqëruar breza të tërë. /Prive By Liberta Spahiu
