Sezoni i verës është në prag dhe Ulqini mbetet pa diskutim një nga destinacionet më të preferuara për shqiptarët, por këtë vit duhet të mendoheni dy herë para se të dilni nga vija bregdetare pa u veshur. Harrojeni shëtitjen nëpër qytet apo drekat me rroba banje, pasi rregullat e lojës sapo kanë ndryshuar dhe goditja në kuletë do të jetë mjaft e ndjeshme.
Kuvendi i Ulqinit ka miratuar së fundmi një rregullore të re dhe mjaft strikte, e cila synon të rikthejë rendin dhe etikën në hapësirat publike të qytetit. Tashmë, lëvizja me rroba banje apo pjesërisht i zhveshur nëpër rrugë, sheshe, shëtitore, zona për këmbësorë dhe parqe do të ndëshkohet pa asnjë tolerim. Rregulli i ri nuk vlen, natyrisht, për zonat e destinuara ekskluzivisht për plazh, por lë të kuptohet se sapo të shkelni në asfalt, rrobat janë të detyrueshme.
Lajmi është bërë i ditur përmes një raportimi nga gazetarja Eliana Peku për Radio Ulqin, e cila thekson se sanksionet financiare nuk janë aspak të lehta. Sipas vendimit të ri, personat fizikë që kapen duke shkelur këtë rregullore do të përballen me gjoba të rënda që variojnë nga 350 deri në plot 500 euro.
Ky veprim i autoriteteve lokale vjen si një masë e domosdoshme për të rregulluar sjelljen e turistëve në zonat urbane dhe periferike, me qëllim ruajtjen e imazhit të qytetit dhe respektimin e hapësirave të përbashkëta jashtë zonave rekreative bregdetare. Ndaj, këtë verë sigurohuni që të keni gjithmonë një bluzë apo fustan me vete kur lini çadrën, përndryshe pushimet tuaja në Ulqin mund t’ju kushtojnë shumë më tepër nga ç’e kishit planifikuar. /Prive By Liberta Spahiu
