Kuzhinieri me famë botërore dhe me origjinë shqiptare, Rene Rexhepi, ka marrë vendimin për t’u larguar nga drejtimi i “Noma” në Kopenhagë – i shpallur disa herë si restoranti më i mirë në botë. Krahas restorantit, ai ka dhënë dorëheqjen edhe nga bordi i “MAD”, organizatës jofitimprurëse që ai vetë e themeloi në vitin 2011 për të ndihmuar të rinjtë në industrinë e kulinarisë.
Pse erdhi kjo dorëheqje?
Vendimi vjen pas një vale akuzash të rënda për krijimin e një ambienti toksik pune. Gjithçka mori vëmendje të madhe pas një artikulli të The New York Times, ku dhjetëra ish-punonjës dëshmuan për një kulturë abuzive ndër vite, që përfshinte presione verbale dhe keqtrajtime fizike. Ish-punonjësi Jason Ignacio White theksoi publikisht se heshtja përballë këtyre situatave është më e rëndë sesa ngritja e zërit në mbrojtje të kolegëve.
Protestat dhe anulimet në Los Angeles
Stuhia mediatike goditi fiks në momentin kur “Noma” po përgatitej të niste dje (më 11 mars) një seri darkash ekskluzive në Los Angeles, ku një rezervim kushtonte plot 1500 dollarë dhe biletat ishin shitur brenda pak minutash. Megjithatë, ngjarja u shoqërua me tërheqjen e disa sponsorëve kryesorë dhe protesta nga aktivistët e të drejtave të punëtorëve. “Askush nuk dëshiron të hajë në një ambient abuzimi,” u shpreh Saru Jayaraman nga organizata për mbrojtjen e punëtorëve.
Reagimi dhe ndjesa e Rexhepit
Përballë kësaj situate, shefi i njohur reagoi në Instagram duke pranuar përgjegjësitë. Ai pranoi se në të kaluarën ka humbur kontrollin duke u bërtitur dhe shtyrë punonjësit, veprime që i cilësoi si të papranueshme, dhe zbuloi se ka ndjekur terapi për menaxhimin e zemërimit.
“Një kërkim falje nuk është e mjaftueshme, unë marr përgjegjësi për veprimet e mia,” shkroi Rexhepi, duke theksuar se pas dy dekadash punë, është koha t’u lërë hapësirë drejtuesve të tjerë të talentuar për të udhëhequr kapitullin e ri të “Nomas”. Sipas tij, ekipi aktual i restorantit është më i fortë se kurrë dhe do të vazhdojë rrugëtimin e tij. /Prive By Liberta Spahiu
View this post on Instagram
