Miliarderi Nelson Peltz, babai i Nicola Peltz, ka mbajtur një qëndrim mjaft të matur lidhur me dramën që ka përfshirë vajzën e tij, dhëndrin Brooklyn dhe familjen Beckham.
Gjatë një interviste në eventin “WSJ Invest Live” në Florida, Peltz u pyet drejtpërdrejt për situatën e Nicola-s, por zgjodhi t’i përgjigjej kureshtjes së medieve me një dozë humori: “A ka dalë familja ime kohët e fundit në medie? Nuk e kam vënë re fare”, u shpreh ai me ironi.
Megjithatë, pas shakave, ai dha një këshillë të prerë për çiftin e ri: heshtjen.
“Këshilla ime është të qëndroni sa më larg medieve”, deklaroi miliarderi, duke lënë të kuptohet se ekspozimi i tepërt vetëm sa e rëndon situatën.
Ndonëse këshilla e tij vjen në një kohë kur Brooklyn tashmë e ka bërë konfliktin publik përmes rrjeteve sociale, Nelson Peltz u mundua t’i zbusë tonet.
Ai shtoi: “Vajza ime dhe familja Beckham janë një histori krejt tjetër dhe nuk është për t’u trajtuar këtu sot. Por mund t’ju them se Nicola dhe Brooklyn janë të mrekullueshëm dhe dëshiroj shumë që ata të kenë një martesë të gjatë dhe të lumtur”.
Kujtojmë se e gjithë vëmendja u kthye nga ky konflikt pak javë më parë, kur ishte vetë Brooklyn ai që konfirmoi thashethemet e kahershme.
Në rrëfimin e tij publik, ai nuk u kursye ndaj prindërve të tij, Victoria dhe David Beckham, duke i bërë ata fajtorë kryesorë për tensionet.
Sipas Brooklyn, prindërit e tij kurrë nuk e kishin pranuar Nicola-n dhe kishin tentuar vazhdimisht të ndërhynin në martesën e tyre, arsye kjo pse ai nuk dëshiron të pajtohet me ta.
Deri më tani, familja Beckham ka zgjedhur të mos reagojë zyrtarisht ndaj akuzave të djalit të tyre të madh.
Ajo që bie në sy në daljet e fundit publike është izolimi i Brooklyn-it; ndërsa ai qëndron krah bashkëshortes, vëllezërit dhe motra e tij janë shfaqur më të bashkuar se kurrë krah prindërve, duke mos i dhënë asnjë mbështetje publike vëllait të tyre. /Prive By Liberta Spahiu
