Skena e hip-hopit shqiptar është ndezur sërish, por këtë herë bëhet fjalë për një përplasje të hapur mes gjeneratave. Gjithçka ka nisur pas një interviste të reperit të ri, Ish, në emisionin e Meriton Mjekiqit. Gjatë bisedës, ai bëri një deklaratë të guximshme duke theksuar se koha e reperëve të vjetër ka mbaruar dhe tashmë stafetën e ka marrë plotësisht gjenerata e re e artistëve.
Ajo që e bën këtë situatë edhe më interesante është historia e afërt që protagonistët ndajnë me njëri-tjetrin. Katër vite më parë, ishte pikërisht Stresi ai që i dha dorën dhe mbështetjen e parë reperit Ish në tregun muzikor, duke sjellë bashkëpunimin e tyre të suksesshëm “Out of my mind”. Megjithatë, duket se marrëdhënia miqësore e dikurshme i ka lënë vendin rivalitetit për “fronin” e repit.
Deklarata e reperit të ri nuk është kapërdirë lehtë nga “garda e vjetër”. Stresi ka reaguar menjëherë përmes një postimi në llogarinë e tij në Instagram, duke i dërguar një mesazh të qartë dhe mjaft ironik gjeneratës së re. “Kam dëgju shumë artista këtej e andej ‘ne jemi brezi i ri, s’ka më të tjerë’. Unë ju uroj suksese inshallah bëheni si Drake e si 50 Cent, por kur të ndërrojmë jetë, atëherë jeni të lirë të merrni skenën,” ka shkruar ai krah fotos së tij ku shfaqet me Noizyn.
Sigurisht, ky ping-pong virtual nuk mund të mbyllej pa një kundërpërgjigje. Ish nuk ka humbur kohë dhe i është kthyer ish-bashkëpunëtorit të tij me një postim po të mprehtë. Ai ka ndarë një selfie nga makina e tij, ku shfaqet tepër i relaksuar, duke e shoqëruar me mbishkrimin e shkurtër por shumë goditës: “Mos u stresoni !” – një lojë e hapur fjalësh që targeton direkt emrin e Stresit.
Kjo dramë mes dyshes ka ngjallur menjëherë reagime të shumta në rrjetet sociale dhe te ndjekësit e hip-hopit shqiptar, duke rindezur një debat të njohur: a është vërtet koha që artistët e vjetër të hapin rrugën, apo gjenerata e re ka ende shumë për të vërtetuar para se të “marrë skenën”? /Prive By Liberta Spahiu
