Nëse menduat se i kishit parë të gjitha nga nata më e rëndësishme e modës, Met Gala, epo gaboheni! Fustanet madhështore mund të marrin vëmendjen e parë, por këtë vit… e gjithë magjia dhe inovacioni ishte fokusuar plotësisht te detajet! Gati për një xhiro mes shkëlqimit dhe ekstravagancës? Le të fillojmë!
Gurët e Rihannës dhe “Shega” e A$AP Rocky-t
Këtë herë, sytë tanë nuk mbetën vetëm te veshja e mbretëreshës së pop-it, por te sytë e saj – fjalë për fjalë!
Rihanna shkëlqeu me gurë të çmuar dhe kristale të vendosura me një mjeshtëri të rrallë rreth syve dhe në flokë.
Ndërkohë, A$AP Rocky tregoi se aksesorët epikë nuk janë vetëm për vajzat. Reperi u shfaq me një çantë të vogël nga Chanel në formën e një shege, e cila mori menjëherë vëmendjen e të gjithë blicëve.
Sa “chic”, apo jo?
Lotët e artë të Anok Yai
Po lotët e modeles Anok Yai? Ah, kjo po që është një vepër e mirëfilltë arti! Bukuroshja e njohur na la pa fjalë me një grim që dukej si i dalë nga një pikturë. “Lotët” e saj të artë që rridhnin mbi lëkurën vezulluese, shoqëruar me një gjerdan diamanti mahnitës, ishin padiskutim kryefjala e pamjeve më “divine” të mbrëmjes. Një pamje hyjnore që po bën xhiron e rrjeteve sociale!
Guximi i Kylie Jenner dhe manikyri “i çmendur” i Ashley Graham
Nuk kishte si të mungonte as Kylie Jenner, e cila këtë herë zgjodhi një rrugë më alternative dhe guxoi me një detaj shumë të komentuar: vetullat e zbardhura! Një ndryshim drastik që e bëri të dukej tërësisht ndryshe nga ç’jemi mësuar ta shohim.
Dhe kur jemi te guximi… a e patë manikyrin e Ashley Graham? Nuk bëhet fjalë thjesht për lyerje thonjsh! E gjithë pjesa e majave të gishtave të saj ishte mbuluar me një ngjyrë të fortë argjendi metalik, sikur t’i kishte zhytur duart në argjend të shkrirë. Një detaj tejet i guximshëm dhe unik për një tapet të kuq!
Meshkujt që thyen rregullat
Dhe vajza, mos mendoni se djemtë mbetën pas! Tapeti i kuq pa edhe meshkuj që eksperimentuan në nivele të tjera. Pamë grim dramatik tek sytë me nuanca metalike blu dhe të kuqe, shoqëruar me varëse diamanti tepër elegante, duke treguar se rregullat gjinore të modës janë thyer njëherë e mirë dhe Met Gala është pikërisht vendi për ta bërë këtë.
Epo, ky ishte një shkrim i shkurtër mes detajeve më të “çmendura” dhe të bukura të Met Gala. Cili nga këto ishte i preferuari juaj? /Prive By Liberta Spahiu
View this post on Instagram
